Birhaanuu Naggaa nama jibba Islaamaa qabu ta’uun beekamaadha. Innis kana hin dhoksu, ifatti waan dubbateedhas. Kana jechuun garuu dhimma rakkoo kana isa qofatti hirkisuun rakkoo jiru hammeessuudha male furuuf karaa miti.

Birhaanuu Naggaa osoo gara Ministeera Barnootaatti hin dhufin dura rakkoon sababa amantaa (hijaabaafi niqaabaa akkasumas salaata) tiin walqabatee barattoota Muslimaa irra ga’aa hin turree? Barattoonni Muslimaa bakkoota garaa garaatti shira kanaan barnoota irraa hari’amaa hin turree?

Eeyyeen,

Rakkoon kun Birhaanuu Naggaa osoo Ministira Ministeera Barnootaa hin ta’in durallee waanuma tureedha. Inni itti fufsiise male hin eegalle. Kanaafuu maddi rakkoo kanaa duraan jira. Ka’umsa sanatti xiyyeeffachuudha male hoogganaa tokko irratti xiyyeeffachuun rakkoo kana hin furu. Hooggansi jijjiramuu mala. Yoo bu’uurri isaa adda ba’ee hin furamin osoma Birhaanuun bu’eellee hooggansi biraan dhufu waanuna walfakkaataa godha, sanuma itti fufsiisa, kana hin shakkinaa.

Kanaa ol ammoo dheengadda gaafa Ministeerri Barnootaa gabaasa raawwii karoora ji’oota sagalii bara 2017 Mana Maree Bakka Bu’oota Ummataaf dhiyeessuu Ministirichi waan ifa ta’e dubbate.

Keessumaa dhimmi niqaabaa dhorkuu irrattu seerri ba’ee innis waan ajajame raawwataa jiraachuu isaa ibsuun ”nuti (ministeerri barnootaa) waan ajajamne raawwanna, dhimma niqaabaa irratti waan jiru Majlisaa wallin dubbanne wal hubanneerras” jedhe. Wanti inni haasa’aa jiru kun dhimma dhorkaa niqaabaa bara Mallas raawwatameefi seera tumamee amma abbaan isaa balleeffameeti.

Kanaafuu hundee sana (seericha) ta’uu qaba xiyyeeffannaan qabsoo keenyaa. Majlisnis ibsa baasuufi xalayaa barreessuu caalaa waan sana qoratee qorachiisee qabxii tokkoon kana yoo fure dhimmi hoogganaa hin ulfaatu.