Filannoo Majlisa guutuu biyyaatti gaggeeffame hordofuun hoggantoonni gara aangootti dhufani hooggansa sadarkaa adda addaa gaggeessaa jiran Majlisa cimsuu, tajaajila hawaasaa babal’isuufi fedhiin ummataa akka deebii argatu gochuuf hojii jajjabeessaa hojjechaa jiru.

Manni Maree Ol’aanaa Dhimmoota Islaamummaa Naannoo Oromiyaa Sheyik Gaalii Mukhtariin hoogganamu, yaa’ii waliigalaa jalqabaa, marii, fi gamaaggama hojii bakka adda addaatti gaggeesseera.

Yaa’iin Pirezidaantii Majlisa Naannichaan durfamuufi kan Kabajamoo Miseensa Paarlaamaa Ustaaz Kaamil Shamsuu dabalatee gaggeessitoonni hawaasaa akka Ustaaz Sa’iid Huseen, Ustaaz Waziir, fi Ustaaz Shu’yib irratti hirmaatan kun caaseffama Majlisa Magaalaa Mattuu, Iluu Abbaaboor, Buunnoo Beddellee fi Magaalaa Jimmaatti kan geggeeffame yoo ta’u hoggantoonni majlisaalee kanneeniis irratti hirmaataniiru.

Gabaasaaleen, mariin, fi madaalliin yaa’ii kana irratti dhiyaatan ogummaa bu’uura hojmaata dhaabbataa kan hordofee ta’uun bu’a qabeessummaa riifoormii hoggansa haara kun yeroo gabaabaa keessatti hojiirra oolee kan agarsiisudha. Guddinni, milkaa’inni, fi gumaachi dhaabbata tokkoo tooftaalee inni bocuu fi aadaa dhaabbataa inni ijaaru irratti hundaa’a. Manni Maree Ol’aanaan Dhimmoota Islaamummaa Naannoo Oromiyaa gama ijaarsa aadaa dhaabbataatiin yeroo gabaabaa keessatti jijjiirama milkaa’aa galmeessiseera.

Hojii karooraan hojiirra oolchuun, safartuu raawwii hojmaataa hordofuu fi madaaluun, bu’uura caaseffama dhaabbataan gabaasa dhiyeessuun, sirna itti hojmaata keessoo diriirsuun dhaabbaticha ammayyeessuun, ummataatti dhihoo ta’uun, karaa qunnamtii sadarkaa yeroo wajjin walsimuun fooyyessuun jijjiirama gaarii ani arge keessaa muraasa.

Adeemsi ijaarsa dhaabbataa dheeraa ta’uu irra dabaree beekumsa, muuxannoo, fi qabeenya guddaa kan barbaadu ta’uun isaa ni beekama. Haa ta’u malee, jijjiiramni dhaabbataa Majlisni Oromiyaa yeroo muraasaa fi qabeenya muraasaan galmaan gahuu danda’e, fuuldura keenya abdiidhaan akka ilaallu nu taasisa. Dhiyeenya kana Boolee Bulbulaatti gamoo waajjira muummeesaa fi galii argamsiisuu danda’u kan baasii qarshii miliyoona 300 oliin bitame adeemsa ijaarsa dhaabbataa kana keessatti akka milkaa’inaatti kan ilaalamuudha.

Ajandaan ummataa aadaa dhaabbataa cimaa fi abbaa cimaa yeroo qabaatan dhimma yeroo male milkaa’inni isaanii waan hin oolleedha. Jijjiirama gaarii kana akka carraatti ilaaluun, gara jijjiirama caalmaaf galtee godhachuun, jalqabbiiwwan jiraniifi jijjiirama kana fiixaan baasuuf carraaquufi amaanaaa ummataa haala ummanni eegutti galmaan ga’uuf carraaquun itti gaafatamummaa hunda keenyaati. Carraa kanaan jijjirama Manni Maree Ol’aanaa Dhimmoota Islaamaa Oromiyaa yeroo gabaabaa keessatti galmeessiseef hoggantoota isaa galateeffachuun barbaada.

Perezidaantii Kaawunsilii Dargaggoota Muslimaa Itiyoophiyaa Ustaz Hayder Kedir